డీఎస్సీపై మెగా వివాదం ఆంధ్రప్రదేశ్లో అధికార, విపక్షాల మధ్య వాదోపవాదాలు
INTRODUCTION:
ఆంధ్రప్రదేశ్లో డీఎస్సీ-2025 వివాదం సద్దుమణగడం లేదు. తాజాగా ఉపాధ్యాయులపై వైఎస్ఆర్ కాంగ్రెస్ కార్యకర్తలు భౌతిక దాడికి పాల్పడేదాకా వచ్చింది. 2026 సెప్టెంబరు 21న విజయవాడలో జరిగిన డీఎస్సీ–2025 స్పోర్ట్స్ కోటా వివాదం, ఉపాధ్యాయులపై జరిగిన ఘర్షణపై కేవలం ఒకరోజు జరిగిన గొడవ కాదు..గత కొన్ని నెలలుగా వైసీపీ చేస్తున్న ఆరోపణలు, ప్రభుత్వం ఇస్తున్న సమాధానాలు, నియమితులైన ఉపాధ్యాయుల ఆందోళన ..ఇవన్నీ కలిసిన వివాదం.
ANALYTICAL VIEW:
సెప్టెంబరు 21న అసలు ఏం జరిగింది?
విజయవాడలోని స్పోర్ట్స్ అథారిటీ ఆఫ్ ఆంధ్రప్రదేశ్ (SAAP) కార్యాలయం వద్ద ఆందోళనకు వైసీపీ నేతలు, కార్యకర్తలు , డీఎస్సీ–2025లో స్పోర్ట్స్ కోటా కింద నియమితులైన ఉపాధ్యాయులు ఒకే సమయంలో వచ్చారు. వైసీపీ నేతలు డీఎస్సీ స్పోర్ట్స్ కోటా నియామకాలపై సీబీఐ విచారణ కోరుతూ ధర్నా నిర్వహించారు. మరోవైపు, ఉద్యోగాలు పొందిన ఉపాధ్యాయులు తమ నియామకాలు నిబంధనల ప్రకారమే జరిగాయని చెబుతూ శాప్ అధికారులకు వినతిపత్రం ఇవ్వడానికి వచ్చారు. ఇరువర్గాల మధ్య నినాదాలు, వాగ్వాదం తీవ్రం కావడంతో తోపులాట/ఘర్షణ జరిగింది. ఒక ఉపాధ్యాయుడికి తలకు గాయం అయ్యింది. పోలీసులు పరిస్థితిని అదుపులోకి తెచ్చారు. మీడియా కథనాల ప్రకారం.ఉపాధ్యాయులను వైసీపీ వర్గాలు “ఫేక్ సర్టిఫికెట్లతో ఉద్యోగాలు పొందారు”, “డబ్బులు ఇచ్చి ఉద్యోగాలు పొందారు” వంటి ఆరోపణలు చేయడంతో వారు తమ టీఈటీ, జాతీయ/అంతర్జాతీయ క్రీడా సర్టిఫికెట్లను చూపిస్తూ తీవ్రంగా నిరసన తెలిపారు. ప్రభుత్వం ఈ ఘటనను తీవ్రంగా పరిగణించి, సీసీటీవీ/వీడియో ఫుటేజీ ఆధారంగా దాడిలో పాల్గొన్న వారిని గుర్తించి క్రిమినల్ కేసులు నమోదు చేయాలని పోలీసులను ఆదేశించింది.
అసలు డీఎస్సీ–2025 వివాదం ఏమిటి?
మెగా డీఎస్ సీ -2025 ప్రక్రియ మొత్తంలో అక్రమాలు జరిగాయని వైసీపీ ఆరోపిస్తోంది; అయితే సెప్టెంబరు 21న జరిగిన ఘర్షణకు కేంద్రబిందువు ప్రధానంగా స్పోర్ట్స్ కోటా నియామకాలే. మెగా డీఎస్ సీ -2025 ద్వారా ఆంధ్రప్రదేశ్లో 16,347 ఉపాధ్యాయ పోస్టులు భర్తీ చేశారు. ప్రభుత్వం ప్రకారం 3.36 లక్షలకు పైగా అభ్యర్థులు దరఖాస్తు చేసుకున్నారు; పరీక్ష TCS iON విధానంలో నిర్వహించబడింది. ప్రభుత్వం మొత్తం ప్రక్రియను 148 రోజుల్లో పూర్తి చేసి 15,941 మందికి నియామక ఉత్తర్వులు ఇచ్చినట్లు చెబుతోంది. వైసీపీ మాత్రం ఈ ప్రక్రియపై పలు అనుమానాలను లేవనెత్తింది. ఇవీ ప్రధాన ఆరోపణలు…
ప్రశ్నపత్రం లీక్
YSRCP అధినేత వైఎస్ జగన్ మోహన్ రెడ్డి ఆరోపణ ప్రకారం, ప్రశ్నపత్రం తయారీ/నిర్వహణలో సంబంధం ఉన్న వ్యవస్థలోనే పనిచేసిన వ్యక్తికి ప్రశ్నపత్రం ముందుగా లభించిందని, అనంతరం అతను అత్యున్నత ర్యాంకు సాధించాడని ఆరోపించారు. దీనిపై సీబీఐ విచారణ కోరారు.
స్పోర్ట్స్ కోటాలో అక్రమాలు
ఇదే ప్రస్తుతం అత్యంత వివాదాస్పద అంశం. 2025 మే 1న జారీ చేసిన స్పోర్ట్స్ మెగా డీ ఎస్ సీ నోటిఫికేషన్లో 3% హారిజాంటల్ స్పోర్ట్స్ కోటా కింద 421 ఉపాధ్యాయ పోస్టులు భర్తీ చేయనున్నట్లు ప్రకటించారు. ఈ కోటా పోస్టులకు సాధారణ రాత పరీక్ష లేకుండా క్రీడా ప్రతిభ ఆధారంగా ఎంపిక చేసే విధానం నోటిఫికేషన్లో ఉంది. తర్వాత 372 మంది ఈ కోటా కింద నియమితులయ్యారు. కొంతమంది అభ్యర్థులు నిజమైన జాతీయ/రాష్ట్ర స్థాయి క్రీడా ప్రతిభకు సంబంధించిన సర్టిఫికెట్లు కాకుండా అనర్హమైన లేదా అనుమానాస్పద సర్టిఫికెట్ల ఆధారంగా ఉద్యోగాలు పొందారని వైసీసీ ప్రధానంగా ఆరోపిస్తోంది.
వైసీపీ మరో ప్రశ్నను లేవనెత్తింది. డీఎస్సీ నోటిఫికేషన్కు కొద్దికాలం ముందు స్పోర్ట్స్ కోటాను 2% నుంచి 3%కి పెంచడం, రాత పరీక్ష లేకుండా ఎంపిక చేయడం వంటి మార్పులు ఎందుకు చేశారని ప్రశ్నించింది. ఈ అంశాలపై హైకోర్టులో కూడా పిటిషన్లో అభ్యంతరాలు నమోదయ్యాయి. వైసీపీ నాయకులు కొన్ని ప్రశ్నలు తప్పుగా ఉన్నాయని, నార్మలైజేషన్ ద్వారా కొందరికి ప్రయోజనం కలిగిందని, మెరిట్ జాబితాలో అనుమానాలు ఉన్నాయని కూడా ఆరోపించారు.
ఆంధ్రప్రదేశ్ ప్రభుత్వం, లోకేశ్ వాదన ఏమిటి?
ఆంధ్రప్రదేశ్ విద్యాశాఖ మంత్రి నారా లోకేశ్ డీఎస్సీ -2025పై ఆరోపణలను పూర్తిగా ఖండిస్తున్నారు. నియామక ప్రక్రియ పారదర్శకంగా జరిగిందని, 16,347 పోస్టుల భర్తీని 148 రోజుల్లో పూర్తి చేశామని తెలిపారు. పరీక్ష TCS iON సాంకేతిక వ్యవస్థ ద్వారా నిర్వహించామని, సుమారు 42,000 ప్రశ్నల క్వొశ్చెన్ బ్యాంకును ను SCERT నిపుణులు రూపొందించారని, వాటిలో ప్రశ్నలను రాండమ్గా అభ్యర్థులకు కేటాయించారని, స్పోర్ట్స్కోటాలో సర్టిఫికేట్లను శాప్ ద్వారా అనేక దశల్లో పరిశీలించామని పేర్కొన్నారు. ఆరోపణలు చేసే వారు ఆధారాలు చూపాలని లోకేశ్ సవాల్ చేశారు. లో నియమితులైన 372 మంది సామాజిక వర్గాల వారీగా కూడా వివరాలు ఇచ్చామని చెప్పారు: OC–46, BC–185, SC–112, ST–29 అని ఆయన పేర్కొన్నారు. ముఖ్యమంత్రి చంద్రబాబు నాయుడు కూడా సెప్టెంబరు 21న డీఎస్సీ–2025లో అవినీతి లేదా ప్రశ్నపత్రం లీక్ జరగలేదని, అభ్యర్థులు తమ ప్రతిభతో ఉద్యోగాలు సాధించారని చెప్పారు.
ఉపాధ్యాయులు ఎందుకు వైసీపీపై ఆగ్రహం వ్యక్తం చేస్తున్నారు?
తాము ఫేక్ సర్టిఫికెట్లతో ఉద్యోగాలు పొందలేదని ఉద్యోగాలు పొందిన స్పోర్ట్స్ కోటా కింద ఉద్యోగాలు పొందిన ఉపాధ్యాయులు అంటున్నారు. టీఈటీ అర్హతతో పాటు తమ క్రీడా విజయాలకు సంబంధించిన సర్టిఫికెట్లు ఉన్నాయని;
వాటిని అధికారికంగా పరిశీలించిన తర్వాతే ఉద్యోగాలు ఇచ్చారని పేర్కొంటున్నారు. కొంతమంది ఉపాధ్యాయులు తమ సర్టిఫికెట్లలో కొన్ని గత వైసీపీ ప్రభుత్వ హయాంలోనే జారీ అయినవని కూడా చూపించారు. తమపై “ఫేక్” అనే ముద్ర వేయడం వల్ల పాఠశాలల్లో విద్యార్థులు, సహచర ఉపాధ్యాయుల ముందు ఇబ్బంది పడుతున్నామని వారు ఆవేదన వ్యక్తం చేశారు.
మొత్తంగా పరిశీలిస్తే వైసీపీ అనేక ఆరోపణలు చేసింది, సీబీఐ విచారణ కోరుతోంది. మరోవైపు ప్రభుత్వం అవినీతి జరగలేదని, ప్రక్రియ నిబంధనల ప్రకారం జరిగిందని చెబుతోంది. అయితే కొన్ని నియామకాలకు సంబంధించి న్యాయస్థానాల్లో అభ్యంతరాలు/పిటిషన్లు కూడా వచ్చాయి. ఉదాహరణకు, ఒక అభ్యర్థి స్పోర్ట్స్ సర్టిఫికెట్ను శాప్ ధ్రువీకరించలేదన్న కారణంతో తన నియామకం నిలిచిపోయిందని హైకోర్టును ఆశ్రయించారు. ఈ మూడు వాదనల్లో ఏది వాస్తవమో తేల్చడానికి సమయం పట్టేలా ఉంది. సర్టిఫికేట్ల అధికారిక ధ్రువీకరణ, నియామక రికార్డులు, సంబంధిత ప్రభుత్వ ఉత్తర్వులు, కోర్టు/దర్యాప్తు ఫలితాలు కీలకం కానున్నాయి.
NEWS AT A GLANCE
https://www.scribd.com/document/864418270/notification-5-1?utm
By RAVIKANTI SRINIVAS